Enredando saberes, tecendo galego

Ás veces as mellores aprendizaxes nacen dunha pregunta, dunha visita inesperada ou dun

proxecto que comeza como unha pequena idea. Con ese espírito nace Enredando saberes,

tecendo galego, un proxecto co que queremos converter a escola nun espazo onde

investigar, crear e descubrir… sempre en galego.

Este proxecto busca que o alumnado aprenda facendo, explorando temas que esperten a

súa curiosidade e conecten co mundo real. Haberá saídas, encontros con persoas expertas,

pequenas investigacións e proxectos creativos nos que cada neno e nena poderá

desenvolver os seus intereses. A ciencia, a arte, a natureza, a literatura ou a cultura galega

iranse entrelazando para formar unha rede de aprendizaxes chea de preguntas,

descubrimentos e ideas novas.

Pero hai un fío que une todas estas experiencias: a lingua galega. O galego será a lingua

para preguntar, investigar, contar, debater e crear. En definitiva, será a lingua para vivir a

aprendizaxe.

Este proxecto tamén se conecta cos Polos Creativos do centro, xa que promove actividades

nas que o alumnado desenvolve habilidades, experimenta con materiais e transforma as

súas ideas en creacións propias.O nome non é casual.

“Enredando saberes” fala de conectar coñecementos, mentres

“tecendo galego” lembra que a nosa lingua é o fío que une todo o que facemos.

Ao longo do curso iremos compartindo neste blog experiencias, saídas, encontros e

creacións do alumnado. Porque aprender tamén pode ser iso: descubrir o mundo mentres tecemos futuro en galego